ગુજરાતમાં ચોમાસાની ગતિ હજુ પણ ધીમી રહેતાં રાજ્યના અનેક વિસ્તારોમાં વરસાદની રાહ જોવાઈ રહી છે. છેલ્લા 24 કલાક દરમિયાન રાજ્યના 95 તાલુકાઓમાં વરસાદ નોંધાયો હતો, પરંતુ સરેરાશની સરખામણીએ વરસાદની સ્થિતિ હજુ પણ ચિંતાજનક છે. હવામાન વિભાગે આગામી સાત દિવસ સુધી રાજ્યમાં હળવાથી મધ્યમ વરસાદી માહોલ યથાવત્ રહેવાની આગાહી કરી છે.
કપરાડામાં સૌથી વધુ 3.70 ઇંચ વરસાદ
છેલ્લા 24 કલાક દરમિયાન દક્ષિણ ગુજરાતમાં વરસાદનું પ્રમાણ વધુ રહ્યું હતું. વલસાડ જિલ્લાના કપરાડામાં સૌથી વધુ 3.70 ઇંચ વરસાદ નોંધાયો હતો. ઉપરાંત ખેરગામમાં 2.17 ઇંચ, કામરેજમાં 2.13 ઇંચ, પેટલાદમાં 2.05 ઇંચ, સોજીત્રામાં 1.97 ઇંચ, ઘોઘંબામાં 1.77 ઇંચ, નાનાપોંઢામાં 1.46 ઇંચ, ભાવનગરમાં 1.42 ઇંચ, પલસાણામાં 1.42 ઇંચ, વાલિયામાં 1.18 ઇંચ, ધરમપુરમાં 1.06 ઇંચ, બારડોલીમાં 0.98 ઇંચ, સિનોરમાં 0.87 ઇંચ, બરવાળામાં 0.83 ઇંચ અને પારડીમાં 0.79 ઇંચ વરસાદ નોંધાયો હતો.
રાજ્યમાં હજુ પણ 31 ટકા વરસાદની ખોટ
ચાલુ ચોમાસા દરમિયાન ગુજરાતમાં અત્યાર સુધી માત્ર 4.60 ઇંચ સરેરાશ વરસાદ નોંધાયો છે, જ્યારે આ સમયગાળામાં સામાન્ય રીતે 9.64 ઇંચ વરસાદ થવો જોઈએ. એટલે કે રાજ્યમાં સરેરાશ કરતાં 31 ટકા ઓછો વરસાદ નોંધાયો છે. વરસાદની અછતને કારણે ખેડૂતોની ચિંતા વધી છે અને જળાશયો તેમજ ડેમોમાં પાણીની આવક પર પણ અસર જોવા મળી રહી છે.
આગામી દિવસોમાં કેવું રહેશે વાતાવરણ?
હવામાન વિભાગના અનુમાન મુજબ, 18 જુલાઈથી આગામી ત્રણ દિવસ સુધી અમદાવાદ, ગાંધીનગર સહિત ઉત્તર ગુજરાત, સૌરાષ્ટ્ર-કચ્છ અને દક્ષિણ ગુજરાતના વિવિધ જિલ્લાઓમાં છૂટાછવાયા સ્થળોએ હળવાથી મધ્યમ વરસાદ અથવા ગાજવીજ સાથે ઝાપટાં પડી શકે છે.
21 જુલાઈ બાદ દક્ષિણ ગુજરાતમાં વરસાદ વધવાની શક્યતા
હવામાન વિભાગે જણાવ્યું છે કે 21થી 23 જુલાઈ દરમિયાન દક્ષિણ ગુજરાતના જિલ્લાઓમાં વરસાદનું પ્રમાણ વધવાની સંભાવના છે. જ્યારે ઉત્તર ગુજરાત અને સૌરાષ્ટ્ર-કચ્છમાં હળવાથી મધ્યમ વરસાદની સ્થિતિ યથાવત્ રહેવાની શક્યતા છે. રાજ્યમાં સારા વરસાદ માટે ખેડૂતો અને નાગરિકોની નજર હવે આગામી દિવસોના હવામાન પર ટકેલી છે.
Follow Us On Google News
Follow Us On WhatsApp
Follow Us On facebook
Leave a Comment