મુંબઈ : ઈરાન અને અમેરિકા વચ્ચે યુદ્વના અંતની આશા ફરી પડીભાંગી છે. ટૂંક સમયમાં યુદ્વનો અંત આવવાનું અમેરિકી રાષ્ટ્રપતિ ડોનાલ્ડ ટ્રમ્પે આશ્વાસન આપીને ફરી એકાએક પલ્ટી મારીને ઈરાન દ્વારા યુદ્વ સંધિનો રજૂ કરાયેલો ડ્રાફ્ટ સાચો નહીં હોવાનું જણાવીને ફરી ઈરાન પર હુમલા કરી દેતાં અને વળતાં હુમલામાં ઈરાને અમેરિકી બેઝ પર હુમલો કરતાં જીઓપોલિટીકલ ટેન્શન વધ્યું છે. આ ટેન્શન વચ્ચે આજે વૈશ્વિક બજારોમાં ફરી મોટી ઉથલપાથલ મચી હતી.
વિશ્વ બજારમાં ક્રુડ ઓઈલના ભાવમાં ગઈકાલે કડાકા બાદ આજે સવારથી ભાવો ફરી ચારથી પાંચ ટકા ઉછળી આવ્યા હતા. વૈશ્વિક શેર બજારોમાં આજે ખાસ એશીયા અને યુરોપના દેશોના બજારોમાં ધોવાણ થયું હતું.
ભારતીય શેર બજારો આજે-ગુરૃવારે બકરી ઈદ નિમિતે બંધ રહ્યા હતા. પરંતુ નિફટી ૫૦ના સાંકેતિક ઈન્ડેક્સ ગિફ્ટ નિફટીમાં આજે સવારે ૩૦૦થી વધુ પોઈન્ટના કડાકા બાદ સાંજે ઘટાડો પચાવીને ૧૮થી ૨૦ પોઈન્ટનો સુધારો બતાવાતો હતો. ગિફટ નિફટી આજે નીચામાં ૨૩૫૫૧ અને ઉપરમાં ૨૩૮૯૭ સુધી જઈ છેલ્લે સાંજે ૨૩૬૫૮ નજીક રહ્યો હતો. ક્રુડ ઓઈલના આંતરરાષ્ટ્રીય ભાવ સાંજે બેથી ત્રણ ટકા એટલે કે બે ડોલર જેટલા વધીને બ્રેન્ટ ક્રુડ બેરલ દીઠ ૯૬ ડોલર નજીક અને નાયમેક્ષ-ન્યુયોર્ક ક્રુડ ૯૦.૭૫ ડોલર નજીક રહ્યા હતા.
એશીયા-પેસેફિક દેશોના બજારોમાં આજે સાર્વત્રિક ગાબડાં પડયા હતા. જાપાનના ટોક્યો શેર બજારનો નિક્કી ૨૨૫ ઈન્ડેક્સ ૩૦૬ પોઈન્ટ તૂટીને ૬૪૬૯૩, હોંગકોંગનો હેંગસેંગ ૩૨૨ પોઈન્ટ તૂટીને ૨૫૦૦૮, તાઈવાન વેઈટેજ ૬૨૦ પોઈન્ટ ગબડીને ૪૩૬૩૬, દક્ષિણ કોરિયાનો કોસ્પી ૪૪ પોઈન્ટ ઘટીને ૮૧૮૫ રહ્યા હતા. જ્યારે ચાઈનાનો શાંઘાઈ કોમ્પોઝિટ પાંચ પોઈન્ટ વધીને ૪૦૯૮ રહ્યા હતા.
યુરોપના દેશોના બજારોમાં પણ ઈરાન-અમેરિકા યુદ્વને લઈ ચિંતાએ વ્યાપક નરમાઈ જોવાઈ હતી. લંડન શેર બજારનો ફુત્સી ઈન્ડેક્સ ૮૭ પોઈન્ટનો ઘટાડો, ફ્રાંસનો કેક ૪૦ ઈન્ડેક્સ ૪૨ પોઈન્ટનો ઘટાડો અને જર્મનીનો ડેક્ષ ૨૦૦ પોઈન્ટનો ઘટાડો બતાવતા હતા. અમેરિકી શેર બજારોમાં સાંજે ખુલતામાં ડાઉ જોન્સમાં ૧૦૦ પોઈન્ટનો ઘટાડો અને નાસ્દાકમાં ૨૦ પોઈન્ટનો સુધારો બતાવાતો હતો.
Follow Us On Google News
Follow Us On WhatsApp
Follow Us On facebook
Leave a Comment