IPL 2027: રિષભ પંતની દિલ્હી કેપિટલ્સમાં ‘ઘરવાપસી’! બદલામાં આ ઘાતક સ્પિનર LSGમાં જશે: રિપોર્ટ | ipl 2027 rishabh panttrade delhi capitals kuldeep yadav lsg

Pant is Returning To Delhi Capital?: ઇન્ડિયન પ્રીમિયર લીગ (IPL) 2027ની આગામી સીઝન પહેલા ક્રિકેટ જગતના સૌથી મોટા સમાચાર સામે આવી રહ્યા છે. આ સીઝનના પ્રથમ મોટા ટ્રેડિંગ અંતર્ગત લખનૌ સુપર જાયન્ટ્સ (LSG) તેમના સ્ટાર ખેલાડી રિષભ પંતને તેની જૂની ફ્રેન્ચાઇઝી દિલ્હી કેપિટલ્સ (DC)માં પરત મોકલે તેવા રિપોર્ટ બહાર આવી રહ્યાં છે. આ ડીલના બદલામાં દિલ્હી કેપિટલ્સના ઘાતક બોલર કુલદીપ યાદવ લખનૌની ટીમમાં સામેલ થશે એવી ચર્ચા છે. જોકે આ વિશે કોઈ સત્તાવાર જાહેરાત કરવામાં નથી આવી.

મળતી માહિતી મુજબ, વર્ષ 2025ના મેગા ઓક્શનમાં LSGએ રિષભ પંતને INR 27 કરોડની ઐતિહાસિક કિંમતે ખરીદીને આઇપીએલ ઇતિહાસનો સૌથી મોંઘો ખેલાડી બનાવ્યો હતો. જોકે, હવે આ ટ્રેડ અંતર્ગત પંત INR 15 કરોડની રકમ સાથે દિલ્હી કેપિટલ્સમાં પરત ફરશે. બંને ફ્રેન્ચાઇઝી હાલમાં આ ડીલની અંતિમ ઔપચારિકતાઓ પૂરી કરી રહી છે અને ટૂંક સમયમાં જ તેને મંજૂરી માટે BCCI સમક્ષ મોકલવામાં આવશે એવી ચર્ચા છે.

Also Read

ટીમ ઇન્ડિયામાં રાતોરાત આ ઘાતક ઓલરાઉન્ડરની એન્ટ્રી, ચેન્નાઈ વનડે પહેલા BCCIનો મોટો નિર્ણય! | harshit rana added india squad final afghanistan odi chennai

પર્સ મની પર શું અસર પડશે?

Also Read

અલકાપુરીના શ્રીમ શાલીની મોલમાં ગેરકાયદે બાંધકામો સામે તંત્રની કાર્યવાહી | VMC Demolition Drive: Action Against Illegal Construction At Shreem Shalini Mall In Alkapuri

આ ટ્રેડિંગના પરિણામે બંને ટીમોના ઓક્શન પર્સમાં મોટો ફેરફાર જોવા મળશે:

• લખનૌ સુપર જાયન્ટ્સ: પંતના જવાથી અને કુલદીપ યાદવ (સેલરી: INR 13.25 કરોડ)ના આવવાથી લખનૌના પર્સમાં INR 13.75 કરોડનો ફાયદો થશે અને આ રકમ તેમની વૉલેટમાં ઉમેરવામાં આવશે.

• દિલ્હી કેપિટલ્સ: દિલ્હીની ટીમે પંતને INR 15 કરોડ ચૂકવવા માટે પોતાના પર્સમાંથી INR 1.25 કરોડની કપાત કરવી પડશે.

રવીન્દ્ર જાડેજા પછી રિષભ પંત આઇપીએલ ઇતિહાસનો બીજો એવો મોટો ખેલાડી બનશે જે ટ્રેડિંગ દરમિયાન પોતાની સેલરીમાં કાપ મૂકવા તૈયાર થયો હોય. અગાઉ IPL 2026 પહેલા ચેન્નાઈ સુપર કિંગ્સે સંજુ સેમસનના બદલામાં જાડેજાને રાજસ્થાન રોયલ્સ સાથે સ્વેપ કર્યો હતો. સૂત્રોના જણાવ્યા અનુસાર, પંતનો સંપર્ક દિલ્હી ઉપરાંત અન્ય એક ફ્રેન્ચાઇઝીએ પણ કર્યો હતો જે અગાઉ એક કરતાં વધુ વખત આઇપીએલ ટાઇટલ જીતી ચૂકી છે.

કુલદીપ યાદવ પોતાના હોમ સ્ટેટની ટીમમાં રમશે

ઘરઆંગણાના ક્રિકેટમાં ઉત્તર પ્રદેશ તરફથી રમતા કુલદીપ યાદવ માટે હવે લખનૌ સુપર જાયન્ટ્સ તરફથી રમવું એ હોમ ગ્રાઉન્ડ જેવો અનુભવ રહેશે. T20 વર્લ્ડ કપની વિજેતા ભારતીય ટીમમાં મોટાભાગનો સમય બેન્ચ પર વિતાવ્યા બાદ, ચાલુ વર્ષે કુલદીપ માટે આઇપીએલ સીઝન થોડી મુશ્કેલ રહી હતી. જોકે, ઓવરઓલ રેકોર્ડ જોઈએ તો ડાબા હાથનો આ સ્પિનર દિલ્હી માટે મોટો મેચ-વિનર સાબિત થયો છે. વર્ષ 2022માં દિલ્હી સાથે જોડાયા બાદ તેણે 65 મેચમાં 8.24ની ઇકોનોમીથી 72 વિકેટ ઝડપી છે.

લખનૌ સુપર જાયન્ટ્સમાં પંતનો સંઘર્ષ અને સુકાનીપદ છોડવાનો નિર્ણય

IPL 2026ની ફાઇનલના બે દિવસ પહેલા જ રિષભ પંતે લખનૌ ફ્રેન્ચાઇઝીને સ્પષ્ટ કરી દીધું હતું કે તે ટીમની કેપ્ટનશીપ છોડી રહ્યો છે. ઉલ્લેખનીય છે કે, IPL 2026માં લખનૌની ટીમ પોઇન્ટ ટેબલમાં સૌથી નીચે એટલે કે દસમા સ્થાને રહી હતી. ટીમના ડિરેક્ટર ટોમ મૂડીએ પણ સંકેત આપ્યા હતા કે ટીમ મેનેજમેન્ટ નેતૃત્વમાં મોટો બદલાવ કરવા ઈચ્છે છે.

લખનૌ સુપર જાયન્ટ્સ સાથે પંતની બે સીઝન અત્યંત સામાન્ય રહી હતી. કેપ્ટન તરીકે તેણે 10 મેચ જીતી અને 18 મેચ ગુમાવી હતી. બેટ્સમેન તરીકે પણ પંતે 26.4ની સરેરાશ અને 135.74ના સ્ટ્રાઇક રેટથી માત્ર 581 રન બનાવ્યા હતા, જે તેના કરિયરના સામાન્ય આંકડા કરતાં ઘણા ઓછા છે.

દિલ્હી કેપિટલ્સ સાથે પંતનો શાનદાર ટ્રેક રેકોર્ડ

લખનૌની સરખામણીએ દિલ્હી કેપિટલ્સ સાથે પંતનો રેકોર્ડ ઘણો ઉત્કૃષ્ટ રહ્યો છે. વર્ષ 2021માં તે આઇપીએલ ઇતિહાસનો પાંચમો સૌથી યુવા કેપ્ટન બન્યો હતો. તેણે 2021થી 2024 દરમિયાન (2023માં કાર અકસ્માતને કારણે તે રમી શક્યો નહોતો) દિલ્હીની 44 મેચમાં આગેવાની કરી હતી, જેમાંથી ટીમે 24માં જીત મેળવી હતી અને 19માં હારનો સામનો કરવો પડ્યો હતો. કેપ્ટન તરીકે પંતે દિલ્હી માટે 35.44ની એવરેજ અને 143.96ના આક્રમક સ્ટ્રાઇક રેટ સાથે 1205 રન બનાવ્યા હતા.

આ પણ વાંચો: ફીફા વર્લ્ડ કપનું મેદાન બન્યું જંગનું મેદાન: કેનેડા અને કતારના ખેલાડીઓ વચ્ચે જોરદાર મારામારી, એક ખેલાડીને સ્ટ્રેચર પર બહાર લઈ જવાયો

જો આ ટ્રેડ સત્તાવાર રીતે સફળ થશે, તો રિષભ પંતની દિલ્હીમાં વાપસી હાર્દિક પંડ્યાની મુંબઈ ઇન્ડિયન્સમાં વાપસી જેવી જ ગણાશે. પંતે વર્ષ 2016માં દિલ્હી ડેરડેવિલ્સ (હવે દિલ્હી કેપિટલ્સ) તરફથી જ પોતાના આઇપીએલ કરિયરની શરૂઆત કરી હતી. જોકે, વર્ષ 2025ના મેગા ઓક્શન પહેલા દિલ્હીના માલિકો કિરણ ગ્રાંધી અને પાર્થ જિંદાલ સાથે યોગ્ય સહમતી ન સધાતા તે ટીમથી અલગ થયો હતો. જોકે અત્યારે આ તમામ અટકળો છે. બેમાંથી એક પણ ટીમ દ્વારા સત્તાવાર રીતે એની કોઈ જાહેરાત કરવામાં નથી આવી.