Gujarat Dam Overflow News : 5 દિવસની મેઘમહેરે ગુજરાતનો નકશો બદલ્યો! 14 ડેમ ઓવરફ્લો, 21 હાઈ એલર્ટ પર

ગુજરાતમાં છેલ્લા પાંચ દિવસથી વરસી રહેલા સાર્વત્રિક વરસાદે રાજ્યની જળ પરિસ્થિતિ સંપૂર્ણપણે બદલી નાંખી છે. થોડા દિવસો પહેલાં સુધી વરસાદની અછત અને પાણીની ચિંતા વચ્ચે જીવતું રાજ્ય હવે અનેક વિસ્તારોમાં પૂર જેવી સ્થિતિનો સામનો કરી રહ્યું છે.

છેલ્લા 120 કલાકમાં રાજ્યના જળાશયોમાં 750 મિલિયન ક્યુબિક મીટરથી વધુ પાણીની આવક નોંધાઈ છે. પરિણામે રાજ્યના 14 ડેમ સંપૂર્ણ ભરાઈ ગયા છે, જ્યારે 21 ડેમ હાઈ એલર્ટ પર પહોંચી ગયા છે. રાજ્યનો મોસમી સરેરાશ વરસાદ પણ વધીને 52 ટકા સુધી પહોંચી ગયો છે.

દક્ષિણ ગુજરાતમાં 8 ડેમ ઓવરફ્લો
દક્ષિણ ગુજરાતમાં વરસાદની સૌથી વધુ અસર જોવા મળી રહી છે. સંપૂર્ણ ભરાયેલા 14 ડેમમાંથી 8 ડેમ આ વિસ્તારમાં આવેલા છે. દમણગંગા ડેમમાં 55,300 ક્યુસેકથી વધુ પાણીની આવક થતાં સુરક્ષાના ભાગરૂપે 53,000 ક્યુસેક પાણી નિયંત્રિત રીતે છોડવામાં આવી રહ્યું છે. નવસારી જિલ્લાના ઝૂઝ અને કેલિયા ડેમ પણ 100 ટકા ભરાઈ જતાં ઓવરફ્લો થઈ રહ્યા છે.

Also Read

Gujarat Rain Update : અમદાવાદ સહિત ધોળકા-ધંધુકામાં મેઘમહેર! 11 જિલ્લામાં યલો એલર્ટ, 30 જુલાઈથી ભારે વરસાદની આગાહી

સૌરાષ્ટ્રના જળાશયોમાં પણ નોંધપાત્ર વધારો
સૌરાષ્ટ્રમાં પણ છેલ્લા પાંચ દિવસમાં વરસાદે જળાશયોની સ્થિતિમાં મોટો ફેરફાર લાવ્યો છે. અહીંના ડેમોમાં સરેરાશ જળસંગ્રહ 39.14 ટકાથી વધીને 46.36 ટકા થયો છે. મોરબીનો મચ્છુ-2 ડેમ સંપૂર્ણ ભરાઈ જતાં 18,500 ક્યુસેકથી વધુ પાણી છોડવામાં આવી રહ્યું છે, જ્યારે ભાવનગરનો શેત્રુંજી ડેમ પણ ઓવરફ્લો થયો છે.

Also Read

Bapunagar AMTS Bus Fire : અમદાવાદના બાપુનગરમાં AMTSની ચાલતી બસ બની ‘અગનગોળો’, ડ્રાઈવરની સમયસૂચકતાએ અનેક જીવ બચાવ્યા

સરદાર સરોવર ડેમમાં પાણીની સપાટી સતત વધી રહી છે
રાજ્યની જીવનદોરી ગણાતા સરદાર સરોવર નર્મદા ડેમમાં પણ પાણીની સપાટી સતત વધી રહી છે. ડેમની મહત્તમ ઊંચાઈ 163 મીટર અને પૂર્ણ જળસપાટી 138.68 મીટર છે. હાલમાં ડેમની જળસપાટી 128.11 મીટરથી વધુ નોંધાઈ છે, જે તેની કુલ જળસંગ્રહ ક્ષમતાના આશરે 69.25 ટકા જેટલી છે. રાજ્યના કુલ 206 જળાશયોમાં હાલમાં 7,080.42 મિલિયન ક્યુબિક મીટર પાણીનો સંગ્રહ થયો છે. જોકે ગત વર્ષે આ જ સમયગાળામાં જળસંગ્રહ 8,650.28 મિલિયન ક્યુબિક મીટર હતો, એટલે કે હજુ પણ ગત વર્ષની સરખામણીએ આશરે 2,570 મિલિયન ક્યુબિક મીટર પાણીની ઘટ નોંધાઈ રહી છે.

તંત્ર સતત સ્થિતિ પર નજર રાખી રહ્યું છે
ભારે વરસાદ અને સતત વધી રહેલા જળસંગ્રહને ધ્યાનમાં રાખીને જળસંપત્તિ વિભાગે હાઈ એલર્ટ પર આવેલા ડેમોની સતત દેખરેખ શરૂ કરી છે. નીચાણવાળા વિસ્તારોમાં રહેતા લોકોને સતર્ક રહેવા, નદીકાંઠાના વિસ્તારોમાં અનાવશ્યક અવરજવર ટાળવા અને સ્થાનિક તંત્રની સૂચનાઓનું પાલન કરવાની અપીલ કરવામાં આવી છે.