આજના સમયમાં વાયરલેસ ઇયરબડ્સ (TWS) લોકોની દિનચર્યાનો મહત્વનો હિસ્સો બની ગયા છે. મ્યુઝિક સાંભળવું હોય, ઓનલાઇન મીટિંગ્સ હોય કે કોલિંગ – દરેક કામ માટે આપણે તેનો ઉપયોગ કરીએ છીએ. પરંતુ ઘણીવાર એવું બને છે કે એક ઇયરબડમાંથી સ્પષ્ટ અવાજ આવે છે જ્યારે બીજામાં અવાજ ખૂબ જ ધીમો થઈ જાય છે.
આવી સ્થિતિમાં મોટાભાગના લોકો માની લે છે કે ઇયરબડ ખરાબ થઈ ગયું છે અને નવું ખરીદવાનું વિચારે છે. પરંતુ ઉતાવળ કરવાને બદલે સૌથી પહેલા એ ચકાસો કે સમસ્યા ખરેખર ઇયરબડની છે કે તમારા સ્માર્ટફોનની! આ માટે તમારા ઇયરબડ્સને કોઈ બીજા ફોન કે લેપટોપ સાથે કનેક્ટ કરીને ચેક કરો, અથવા તમારા ફોનમાં બીજા કોઈ બ્લૂટૂથ ડિવાઇસને કનેક્ટ કરીને જુઓ.
ધૂળ અને કાનનો મેલ (Earwax) હોઈ શકે છે મુખ્ય કારણ
ઇયરબડ્સમાં અવાજ ઓછો થવાનું સૌથી સામાન્ય અને મુખ્ય કારણ તેમાં જમા થતો કચરો અથવા કાનનો મેલ (Earwax) છે. ઇયરબડ્સના સ્પીકરની નાની જાળી (Grille) પર સમય જતાં ધૂળ અને કચરો જામી જાય છે, જેના કારણે અવાજ બહાર આવી શકતો નથી.
આ સમસ્યા દૂર કરવા માટે નરમ, કોરા કપડાં અથવા સોફ્ટ બ્રશનો ઉપયોગ કરીને જાળીને હળવા હાથે સાફ કરો. તમે કોટન સ્વેબ (બડ્સ)નો પણ ઉપયોગ કરી શકો છો. ધ્યાનમાં રાખો કે સફાઈ કરતી વખતે કોઈ ધારદાર કે અણીદાર વસ્તુનો ઉપયોગ ન કરવો, નહિતર ઇયરબડનું અંદરનું સ્પીકર કાયમી ધોરણે ડેમેજ થઈ શકે છે.
કાન માટે યોગ્ય સાઈઝની ઇયર-ટિપ પસંદ કરો
મોટાભાગના ઇયરબડ્સ સાથે અલગ-અલગ કદની સિલિકોન ઇયર-ટિપ્સ (Small, Medium, Large) મળે છે. જો તમારા કાનમાં ઇયરબડ પરફેક્ટ ફિટ ન થતું હોય અથવા ઢીલું રહેતું હોય, તો અવાજ લીક થઈ જાય છે અને તમને ઓછો અવાજ સંભળાય છે.
દરેક વ્યક્તિના બંને કાનની બનાવટ પણ સહેજ અલગ હોઈ શકે છે, તેથી જો જરૂર લાગે તો ડાબા અને જમણા કાન માટે અલગ-અલગ સાઈઝની ટિપ્સનો ઉપયોગ કરો. કાનમાં પરફેક્ટ સીલ (Fit) બનવાથી માત્ર સાઉન્ડ ક્વોલિટી જ નહીં સુધરે, પરંતુ બહારનો ઘોંઘાટ (Noise) પણ ઓછો સંભળાશે.
સ્માર્ટફોનની ‘ઓડિયો બેલેન્સ’ સેટિંગ્સ તપાસો
ઘણીવાર ઇયરબડ્સ એકદમ સાજા હોય છે, પરંતુ આપણા ફોનની હિડન ઓડિયો સેટિંગ્સ બદલાઈ ગઈ હોય છે. તમારા સ્માર્ટફોનમાં ‘લેફ્ટ-રાઇટ ઓડિયો બેલેન્સ’ (Left-Right Audio Balance) નો વિકલ્પ હોય છે. જો આ સ્લાઇડર ભૂલથી કોઈ એક બાજુ ખસી જાય, તો બીજી બાજુનો અવાજ ધીમો કે બંધ થઈ જાય છે.
એન્ડ્રોઇડ ફોન માટે: Settings > Shortcut & Accessibility > Accessibility > Audio Adjustmentમાં જઈને ઓડિયો બેલેન્સ સ્લાઇડરને બરાબર મધ્યમાં (Center) સેટ કરો અથવા Settings > Accessibility > Hearing Enhancements પર જાઓ અને Left/Right sound balance ચકાસો.
ઇયરબડ્સને રીસેટ અને અનપેર (Unpair) કરો
જો સફાઈ અને સેટિંગ્સ બદલ્યા પછી પણ સમસ્યા ઉકેલાય નહીં, તો સોફ્ટવેર કે બ્લૂટૂથ કનેક્ટિવિટીમાં કોઈ ગ્લીચ (Glitches) હોઈ શકે છે.
આ માટે તમારા ફોનના બ્લૂટૂથ સેટિંગ્સમાં જઈને ઇયરબડ્સને ‘Unpair’ અથવા ‘Forget Device’ કરો. ત્યારબાદ બ્લૂટૂથ બંધ કરી ફરી ચાલુ કરો. જો તમારા ઇયરબડ્સના કેસમાં રીસેટ બટન આપેલું હોય, તો તેને 5 થી 10 સેકન્ડ સુધી દબાવી રાખીને ઇયરબડ્સને ફેક્ટરી રીસેટ કરો અને ફરીથી પેર કરો.
Follow Us On Google News
Follow Us On WhatsApp
Follow Us On facebook