બિહારના વૈશાલી જિલ્લાના રાઘોપુર વિસ્તારમાં ગંગા નદીમાં હોડી પલટી જતાં મોટી દુર્ઘટના સર્જાઈ છે. મંગળવારે સાંજે રામપુર શ્યામચંદ ગામ નજીક બનેલી આ ઘટનામાં ઓછામાં ઓછા 11 સગીરોનાં મોત થયાં છે, જ્યારે અનેક લોકો ગુમ હોવાની આશંકા છે. ઘટનાની જાણ થતાં સ્થાનિક લોકો અને વહીવટી તંત્ર દ્વારા બચાવ કામગીરી શરૂ કરવામાં આવી હતી. ગુમ થયેલા લોકોને શોધવા માટે SDRF અને NDRFની ટીમો નદીમાં સર્ચ ઓપરેશન ચલાવી રહી છે.
અંતિમ સંસ્કાર બાદના ભોજન સમારંભમાં જતાં હતા મુસાફરો
પ્રાથમિક અહેવાલો અનુસાર, હોડીમાં આશરે 25થી 30 લોકો સવાર હતા. જોકે, વૈશાલીનાં જિલ્લા મેજિસ્ટ્રેટ વર્ષા સિંહે પ્રાથમિક માહિતીના આધારે હોડીમાં 15થી 20 લોકો સવાર હોવાની વાત જણાવી હતી. હોડીમાં બેઠેલા મોટાભાગના લોકો હિન્દુ અંતિમ સંસ્કારની વિધિ બાદ યોજાયેલા ભોજન સમારંભમાં હાજરી આપવા માટે નજીકના ગામ તરફ જઈ રહ્યા હતા.
એક ગામથી બીજા ગામ વચ્ચે મુસાફરોને લઈ જતી વખતે હોડી અસંતુલિત થઈ ગઈ હતી અને ગંગા નદીમાં પલટી ગઈ હતી. કેટલાક મુસાફરો તરીને સલામત સ્થળે પહોંચવામાં સફળ રહ્યા હતા, જ્યારે અન્ય લોકો પાણીમાં ડૂબી ગયા હતા. ઘટનાને નજરે જોનારા સ્થાનિક લોકો મદદ માટે દોડી આવ્યા હતા અને વહીવટી તંત્રને જાણ કરી હતી.
11 સગીરોનાં મોત, બોટના માલિક સહિત સાત લોકો બચાવાયા
જિલ્લા મેજિસ્ટ્રેટ વર્ષા સિંહના જણાવ્યા અનુસાર, અત્યાર સુધીમાં 11 સગીરોનાં મોત થયાં છે. મૃતકોની ઉંમર આશરે 15 વર્ષની હોવાનું જણાવવામાં આવ્યું છે. હોડીના માલિક સહિત સાત લોકોને બચાવી લેવામાં આવ્યા છે.
જોકે, હોડીમાં સવાર લોકોની ચોક્કસ સંખ્યા અને ગુમ થયેલા મુસાફરો અંગેની વિગતોની ચકાસણી કરવામાં આવી રહી છે. સ્થાનિક લોકો કેટલાક બાળકોને પ્રાથમિક આરોગ્ય કેન્દ્રમાં લઈ ગયા હતા, જ્યાં તબીબે તપાસ બાદ તેમને મૃત જાહેર કર્યા હતા. આ ઘટનાથી મૃતકોના પરિવારોમાં શોકની લાગણી ફેલાઈ ગઈ છે.
અંધારું અને ઊંડું પાણી બચાવ કામગીરીમાં અવરોધ
ઘટનાની ગંભીરતાને ધ્યાનમાં રાખીને SDRF અને NDRFની ટીમોને બચાવ કામગીરીમાં જોડવામાં આવી છે. નદીમાં ગુમ થયેલા મુસાફરોની શોધખોળ ચાલુ છે. જોકે, રાતના અંધારા અને પાણીની ઊંડાઈને કારણે રેસ્ક્યૂ ઓપરેશનમાં મુશ્કેલીઓનો સામનો કરવો પડી રહ્યો છે. જિલ્લા મેજિસ્ટ્રેટે જણાવ્યું હતું કે રાત્રિના સમયે હોડી ચલાવવા પર પ્રતિબંધ છે. આ દુર્ઘટના કેવી રીતે બની અને નિયમોનું પાલન થયું હતું કે નહીં, તે અંગે તપાસ કરવામાં આવશે.
મુખ્યમંત્રીની મૃતકોના પરિવારજનોને ₹4 લાખની સહાયની જાહેરાત
બિહારના મુખ્યમંત્રી સમ્રાટ ચૌધરીએ આ ઘટનાને હૃદયદ્રાવક ગણાવી મૃતકોના પરિવારજનોને ₹4 લાખની સહાય આપવાની જાહેરાત કરી છે. તેમણે વહીવટી તંત્રને બચાવ કામગીરી ઝડપી બનાવવા અને ઘાયલોને યોગ્ય સારવાર મળે તે સુનિશ્ચિત કરવા સૂચના આપી છે.
વિપક્ષના નેતા તેજસ્વી યાદવે પણ આ દુર્ઘટના અંગે દુઃખ વ્યક્ત કર્યું છે. તેમણે રાહત અને બચાવ કામગીરી ઝડપી બનાવવા માટે સ્થાનિક લોકો, વહીવટી તંત્ર અને સંબંધિત અધિકારીઓ વચ્ચે સંકલન વધારવાની વાત કરી છે.
Follow Us On Google News
Follow Us On WhatsApp
Follow Us On facebook