કેન્દ્રીય ગૃહ મંત્રાલયના નિર્દેશાનુસાર દિલ્હી પોલીસે જંતર-મંતરને ‘પ્રોટેસ્ટ સાઇટ’ (Protest Site) તરીકે સત્તાવાર રીતે ડિનોટિફાય કરી દીધું છે. આ નિર્ણય બાદ હવે જંતર-મંતર ખાતે કોઈપણ રાજકીય પક્ષ, સામાજિક સંસ્થા કે નાગરિક જૂથને ધરણા, પ્રદર્શન કે વિરોધ સભા યોજવાની સત્તાવાર પરવાનગી આપવામાં આવશે નહીં.
સુરક્ષા અને કાયદો-વ્યવસ્થાની સ્થિતિને ધ્યાને રાખી નિર્ણય
દિલ્હી પોલીસ અને સંસદ માર્ગ પોલીસ મથકના વરિષ્ઠ અધિકારીઓના જણાવ્યા અનુસાર, જંતર-મંતર એ વીવીઆઈપી (VVIP) લ્યુટીયન્સ ઝોન, સંસદ ભવન અને સરકારી કાર્યાલયોની અત્યંત નજીક આવેલું છે. આ વિસ્તારમાં વારંવાર યોજાતા વિરોધ પ્રદર્શનો અને પ્રદર્શનકારીઓની ભારે ભીડને કારણે દિલ્હીના હૃદયસમા આ વિસ્તારમાં ગંભીર ટ્રાફિક જામ અને સુરક્ષા સંબંધિત જોખમો ઊભા થતા હતા. ગત દિવસોમાં વિવિધ પક્ષો અને સીજીપી (CJP) તથા વિપક્ષી ગઠબંધનના મોટા વિરોધ પ્રદર્શનો દરમિયાન નિર્માણ થયેલી તંગદિલીને પગલે કાયદો અને વ્યવસ્થા જાળવવા માટે આ આકરો નિર્ણય લેવામાં આવ્યો છે.
ધરણા-પ્રદર્શન માટે જાહેર કરાયેલા 3 નવા વિશિષ્ટ સ્થળો
જંતર-મંતર પરથી પ્રદર્શનનો દરજ્જો પાછો ખેંચી લીધા બાદ દિલ્હી પોલીસે નાગરિકો અને વિવિધ આંદોલનકારી જૂથો માટે વિરોધ નોંધાવવા કાયદેસરના 3 નવા સ્થળોની પસંદગી કરી છે:
- રામલીલા મેદાન : મધ્ય દિલ્હીનું ઐતિહાસિક મેદાન જ્યાં મોટા આંદોલનો અને વિશાળ સભાઓ યોજી શકાશે.
- બુરાડી મેદાન : ઉત્તર દિલ્હી સ્થિત નિરંકારી સંત સમાગમ ગ્રાઉન્ડ, જ્યાં હજારો લોકો એકત્રિત થઈ શકે તેવી વિશાળ જગ્યા ઉપલબ્ધ છે.
- CBD ગ્રાઉન્ડ : પૂર્વ દિલ્હીના કરકરડૂમા વિસ્તારમાં આવેલું સીબીડી ગ્રાઉન્ડ, જ્યાં પૂર્વ દિલ્હી તરફથી આવતા આંદોલનકારીઓ વિરોધ નોંધાવી શકશે.
લ્યુટીયન્સ દિલ્હીમાં બેરિકેડિંગ અને સુરક્ષા વ્યવસ્થા ચુસ્ત કરાઈ
ગૃહ મંત્રાલયના આ આદેશ બાદ જંતર-મંતર અને તેની આસપાસના તમામ રસ્તાઓ પર દિલ્હી પોલીસ અને અર્ધસૈનિક દળોનો ભારે બંદોબસ્ત ગોઠવી દેવામાં આવ્યો છે. જંતર-મંતર તરફ જતા માર્ગો પર કાયમી બેરિકેડ્સ લગાવી દેવામાં આવ્યા છે
જેથી કોઈપણ અણધારી સભા કે રેલીને ત્યાં અટકાવી શકાય. પોલીસ તંત્રે તમામ રાજકીય પક્ષો અને સામાજિક સંગઠનોને સ્પષ્ટ સૂચના આપી દીધી છે કે ભવિષ્યના તમામ પ્રદર્શનો માટે માત્ર નવા નિયુક્ત કરાયેલા ત્રણ સ્થળોની જ મંજૂરી આપવામાં આવશે.
Follow Us On Google News
Follow Us On WhatsApp
Follow Us On facebook