દેશ-વિદેશ

Jharkhand : રામગઢની ચુટ્ટુપાલુ ઘાટીમાં બ્રેક ફેલ થતા ટ્રેલરે મચાવી તબાહી, 10થી વધુ વાહનો અથડાયા | Gujarat News

Updated: 01-07-2026, 09.26 PM

ઝારખંડના રામગઢ જિલ્લામાં રાંચી-પટણા નેશનલ હાઈવે (NH-33) પર આવેલા ચુટ્ટુપાલુ ઘાટીમાં બુધવારે ભીષણ માર્ગ અકસ્માત સર્જાયો હતો. ઘાટીમાંથી નીચે ઉતરી રહેલા એક ટ્રેલરની બ્રેક અચાનક ફેલ થતાં તે બેકાબૂ બની ગયો અને રસ્તા પર આગળ ચાલી રહેલા અનેક વાહનો સાથે અથડાયો. અકસ્માતમાં અંદાજે 10થી 12 વાહનોને નુકસાન થયું છે, જ્યારે 20થી વધુ લોકો ઘાયલ થયા છે. રાહતની વાત એ છે કે અત્યાર સુધી કોઈ જાનહાનિના સમાચાર સામે આવ્યા નથી.

બ્રેક ફેલ થતાં ચાલક વાહન પરનો કાબૂ ગુમાવી બેઠો

પ્રત્યક્ષદર્શીઓના જણાવ્યા મુજબ ટ્રેલર ઊંચી ઝડપે ઘાટીમાંથી નીચે આવી રહ્યું હતું. બ્રેક ફેલ થતાં ચાલક વાહન પરનો કાબૂ ગુમાવી બેઠો અને ટ્રેલર એક પછી એક કાર, કન્ટેનર અને અન્ય વાહનો સાથે અથડાતો ગયો. અથડામણ એટલી જોરદાર હતી કે એક કાર ટ્રેલર અને કન્ટેનર વચ્ચે ફસાઈ ગઈ હતી. અકસ્માતની જાણ થતાં જ રામગઢ પોલીસ અને સ્થાનિક પ્રશાસનની ટીમ તાત્કાલિક ઘટનાસ્થળે પહોંચી હતી.

ઘટનાની વિગતવાર તપાસ શરૂ

સ્થાનિક લોકોની મદદથી રાહત અને બચાવ કામગીરી હાથ ધરવામાં આવી અને વાહનોમાં ફસાયેલા લોકોને બહાર કાઢીને એમ્બ્યુલન્સ મારફતે નજીકની હોસ્પિટલમાં ખસેડવામાં આવ્યા. ઘાયલોમાંથી કેટલાકની સ્થિતિ ગંભીર હોવાનું જણાવાયું છે. અકસ્માતના કારણે રાંચી-પટણા હાઈવે પર લાંબો ટ્રાફિક જામ સર્જાયો હતો. બાદમાં ક્રેનની મદદથી અકસ્માતગ્રસ્ત વાહનોને રસ્તા પરથી હટાવી ટ્રાફિક ધીમે-ધીમે પૂર્વવત્ કરવામાં આવ્યો.