Gujarat Weather Update: ગુજરાતમાં કાળઝાળ ગરમી વચ્ચે હવે હવામાન વિભાગ દ્વારા ભારે પવન સાથે વરસાદની આગાહી કરવામાં આવી છે. રાજ્યના પાટનગર ગાંધીનગર અને આર્થિક પાટનગર અમદાવાદ સહિત વિવિધ જિલ્લાઓમાં આગામી પાંચ દિવસ સુધી 40થી 50 કિલોમીટર પ્રતિ કલાકની ઝડપે તોફાની પવન ફૂંકાવાની અને ગાજવીજ સાથે હળવોથી મધ્યમ વરસાદ પડવાની સંભાવના છે. હવામાન વિભાગે બદલાતા હવામાનને પગલે કેટલાય જિલ્લાઓમાં ‘યલો ઍલર્ટ’ પણ જાહેર કર્યું છે.
આ જિલ્લાઓમાં ‘યલો ઍલર્ટ’ની જાહેરાત
હવામાન વિભાગ દ્વારા શુક્રવાર (પાંચમી જૂન) અને શનિવાર (છઠ્ઠી જૂન) એમ બે દિવસ માટે રાજ્યના જુદા-જુદા ભાગોમાં વરસાદનું યલો ઍલર્ટ આપ્યું છે. શુક્રવારે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, સુરત, ડાંગ, નવસારી, વલસાડ, સુરેન્દ્રનગર, રાજકોટ, જૂનાગઢ અને અમરેલીમાં યલો ઍલર્ટ છે. જ્યારે શનિવારે અરવલ્લી, પંચમહાલ, દાહોદ, વડોદરા, છોટા ઉદેપુર, નર્મદા, અમરેલી, ભાવનગર, ગીર સોમનાથ અને દીવમાં યલો ઍલર્ટ છે.
આ પણ વાંચો: ગુજરાતમાં રાજ્યસભાની ચૂંટણીમાં પણ ‘નો રિપીટ થિયરી’, ભાજપના 4 ઉમેદવાર જાહેર
અમદાવાદમાં તાપમાન ગગડ્યું
અમદાવાદમાં આજે સરેરાશ મહત્તમ તાપમાન 41.4 ડિગ્રી નોંધાયું હતું, જે સામાન્ય કરતાં બે ડિગ્રી ઓછું છે. આગામી દિવસોમાં તાપમાન 40 ડિગ્રીની આસપાસ રહેવાની ધારણા છે. જોકે, અમદાવાદમાં વરસાદને લઈને હવામાન વિભાગ અને સ્થાનિક નિષ્ણાતોના મતમાં તફાવત જોવા મળી રહ્યો છે.
હવામાન વિભાગ અનુસાર, અમદાવાદમાં આવતીકાલથી પાંચ દિવસ સુધી 40થી 50 કિમીની ગતિએ પવન ફૂંકાશે અને ગાજવીજ સાથે હળવોથી મધ્યમ વરસાદ પડી શકે છે.
હવામાન નિષ્ણાતોના મતે અમદાવાદ શહેરમાં આગામી 10 દિવસ સુધી વરસાદ પડવાની સંભાવના નહિવત્ છે, માત્ર પવનનો જોર વધુ રહેશે. ગાંધીનગર, રાજકોટ, સુરત, વડોદરા અને આણંદ જેવા મોટા શહેરોમાં પણ બે દિવસ વરસાદી માહોલ વધુ જોવા મળી શકે છે, જેથી નાગરિકોને ભારે પવન અને ગાજવીજ વખતે સાવચેત રહેવા અપીલ કરવામાં આવી છે.
Follow Us On Google News
Follow Us On WhatsApp
Follow Us On facebook
Leave a Comment