Auqib Nabi Joins Team India Camp: અફઘાનિસ્તાન સામે 6 જૂનથી મુલ્લાંપુરમાં રમાનારી એકમાત્ર ટેસ્ટ મેચ પહેલા જમ્મુ-કાશ્મીરના ફાસ્ટ બોલર આકિબ નબી ભારતીય ટીમના કેમ્પમાં જોડાઈ ગયો છે. જોકે, તેને હજુ સુધી સત્તાવાર ટેસ્ટ સ્ક્વોડમાં સામેલ કરવામાં નથી આવ્યો, પરંતુ રિપોર્ટ્સ પ્રમાણે તે બેકઅપ ખેલાડી તરીકે શુભમન ગિલની આગેવાની હેઠળની ટીમ સાથે ટ્રેનિંગ કરી રહ્યો છે.
BCCIને ટ્રોલિંગનો સામનો કરવો પડ્યો હતો
અફઘાનિસ્તાન સામેની ટેસ્ટ મેચ માટે જ્યારે ટીમ ઈન્ડિયાની જાહેરાત કરવામાં આવી, ત્યારે ભારતીય ક્રિકેટ કંટ્રોલ બોર્ડ (BCCI)ની સિલેક્શન કમિટીને આકિબ નબીના નામને લઈને ભારે ટ્રોલિંગનો સામનો કરવો પડ્યો હતો. આ જ કારણ છે કે, તેનું ભારતીય ટીમના કેમ્પમાં જોડાવું ખાસ માનવામાં આવી રહ્યું છે. અજીત અગરકરની આગેવાની હેઠળની સિલેક્શન કમિટીએ જસપ્રિત બુમરાહને આરામ આપ્યા બાદ આકિબના સ્થાને ગુરનૂર બરારને તક આપી હતી. ત્યારબાદ અનેક ક્રિકેટ નિષ્ણાતો અને ચાહકોએ આકિબ નબીની અવગણના કરવા બદલ સવાલ ઉઠાવ્યા હતા.
ટીમ ઈન્ડિયામાં આકિબ નબીની એન્ટ્રી
હવે ટીમ ઈન્ડિયાના કેમ્પમાં તેની એન્ટ્રીને ભવિષ્યની યોજનાઓ સાથે જોડીને જોવામાં આવી રહી છે. ભલે અફઘાનિસ્તાન સામેની ટેસ્ટમાં તેમનું રમવાનું નક્કી નથી, પરંતુ ભારતીય ટીમ મેનેજમેન્ટ તેની પ્રગતિ પર ઝીણવટભરી નજર રાખી રહ્યું છે. શ્રીલંકા પ્રવાસ માટે તેની દાવેદારી હાલમાં નબળી માનવામાં આવી રહી છે, પરંતુ ઓક્ટોબરમાં ન્યૂઝીલેન્ડ પ્રવાસ પર ફાસ્ટ બોલરો માટે મદદરૂપ પરિસ્થિતિઓને જોતા તે સિલેક્ટર્સની રડાર પર હોઈ શકે છે.
ગત રણજી ટ્રોફી સીઝનમાં શાનદાર પ્રદર્શન
આકિબ નબીએ ગત રણજી ટ્રોફી સીઝનમાં શાનદાર પ્રદર્શન કર્યું હતું. જમ્મુ-કાશ્મીરની ઐતિહાસિક રણજી ટ્રોફી જીતમાં તેણે મહત્વની ભૂમિકા ભજવી હતી અને તે ટીમ માટે સૌથી વધુ વિકેટ લેનાર બોલર રહ્યો હતો. નબીએ 10 ફર્સ્ટ ક્લાસ (પ્રથમ શ્રેણી) મેચોમાં 60 વિકેટ ખેરવી હતી. આ દરમિયાન તેની એવરેજ માત્ર 12.56ની રહી હતી અને તેણે સાત વખત ઈનિંગ્સમાં પાંચ વિકેટ લેવાની સિદ્ધિ (ફાઇવ વિકેટ હોલ) પોતાના નામે કરી હતી.
રણજી ટ્રોફીમાં ધમાકેદાર પ્રદર્શનના દમ પર તેને IPL 2026ના મિની ઓક્શનમાં દિલ્હી કેપિટલ્સે ખરીદ્યો હતો. તે ફ્રેન્ચાઈઝીના સૌથી મોંઘા ભારતીય ખેલાડીઓમાં સામેલ રહ્યો. દિલ્હીએ તેને 8.40 કરોડ રૂપિયામાં ખરીદ્યો હતો. જોકે, IPLમાં તેની પ્રથમ સીઝન આશા અનુરૂપ ન રહી. તે પાંચ મેચ રમ્યો પરંતુ એક પણ વિકેટ ન ઝડપી.
ભારતની ટેસ્ટ ટીમ
ભારતની ટેસ્ટ ટીમ હાલમાં શુભમન ગિલની કેપ્ટનશીપમાં અફઘાનિસ્તાન સામેના મુકાબલાની તૈયારી કરી રહી છે. ટીમમાં યશસ્વી જયસ્વાલ, કેએલ રાહુલ, સાઈ સુદર્શન, રિષભ પંત, દેવદત્ત પડિક્કલ, નીતીશ કુમાર રેડ્ડી, વોશિંગ્ટન સુંદર, કુલદીપ યાદવ, મોહમ્મદ સિરાજ, પ્રસિદ્ધ કૃષ્ણા, માનવ સુથાર, ગુરનૂર બરાર, હર્ષ દુબે અને ધ્રુવ જુરેલ જેવા ખેલાડીઓ સામેલ છે.
આ પણ વાંચો: ઈબોલા વાઈરસ અંગે કેન્દ્ર સરકારની એડવાઈઝરી જાહેર: આફ્રિકાથી આવતા પ્રવાસીઓ માટે ખાસ સૂચના
ભવિષ્ય માટે એક ગંભીર વિકલ્પ
આકિબ નબીને ભલે અત્યારે સત્તાવાર રીતે ટેસ્ટ કેપ ન મળી હોય, પરંતુ ટીમ ઈન્ડિયાના કેમ્પમાં તેની હાજરી એ વાતનો સંકેત છે કે સિલેક્ટર્સ અને ટીમ મેનેજમેન્ટ તેને ભવિષ્ય માટે એક ગંભીર વિકલ્પ તરીકે જોઈ રહ્યા છે. હવે તમામની નજર એ વાત પર રહેશે કે શું કાશ્મીરનો આ ફાસ્ટ બોલર ટૂંક સમયમાં ભારતીય ટેસ્ટ ટીમમાં પોતાનું સ્થાન પાકું કરી શકે છે કે નહીં.
Follow Us On Google News
Follow Us On WhatsApp
Follow Us On facebook
Leave a Comment