આગામી જૂન-જુલાઈમાં યોજાનારો ઈંગ્લેન્ડ અને આયર્લેન્ડનો પ્રવાસ સૂર્યકુમાર યાદવ માટે કારકિર્દીનો સૌથી મહત્વપૂર્ણ વળાંક સાબિત થઈ શકે છે. આ પ્રવાસ દરમિયાન પસંદગીકારો તેની કેપ્ટનશીપ કરતાં તેની બેટિંગ ક્ષમતા પર વધુ ધ્યાન કેન્દ્રિત કરશે.
જો તે આ પ્રવાસમાં નિષ્ફળ રહેશે, તો 2028 સુધી તેને ટીમમાં જાળવી રાખવા અંગે ગંભીર પ્રશ્નો ઉભા થશે. નોંધનીય છે કે ઓલિમ્પિક સમયે સૂર્યાની ઉંમર 38 વર્ષની આસપાસ હશે, જે T20 જેવા ફોર્મેટમાં ફિટનેસ અને ફોર્મ બંને માટે મોટો પડકાર છે.
પસંદગી સમિતિના હાથમાં રહેશે અંતિમ નિર્ણય
જોકે, ટીમના મુખ્ય કોચ ગૌતમ ગંભીર હજુ પણ સૂર્યકુમાર પર વિશ્વાસ ધરાવે છે અને તેઓ ઈચ્છે છે કે 2028 સુધી સૂર્યા ટીમનું નેતૃત્વ કરે. પરંતુ અંતિમ નિર્ણય અજિત અગરકરની આગેવાની હેઠળની પસંદગી સમિતિના હાથમાં રહેશે, જેઓ ભવિષ્યની ટીમના નિર્માણ માટે કડક નિર્ણયો લેવા માટે જાણીતા છે.
આંકડાકીય રીતે નિરાશાજનક રહ્યું છે તાજેતરનું ફોર્મ
સૂર્યકુમાર માટે વર્ષ 2025 અત્યંત ખરાબ રહ્યું હતું, જેમાં તેનો સ્ટ્રાઇક રેટ 120 થી નીચે સરકી ગયો હતો અને તે એક પણ ફિફ્ટી ફટકારી શક્યો નહોતો. વર્ષ 2026 માં તેણે વાપસી કરવાનો પ્રયાસ કર્યો અને વર્લ્ડ કપ પહેલા 160 ના સ્ટ્રાઇક રેટથી ચાર ફિફ્ટી ફટકારી,
પરંતુ મોટી અને નિર્ણાયક મેચોમાં તે ફરી એકવાર નિષ્ફળ સાબિત થયો છે. દક્ષિણ આફ્રિકા અને વેસ્ટ ઈન્ડિઝ સામે માત્ર 18-18 રન, સેમિફાઈનલમાં 11 રન અને ન્યૂઝીલેન્ડ સામેની ફાઈનલમાં ‘શૂન્ય’ રને આઉટ થતા ટીકાકારોએ તેના પર નિશાન સાધ્યું છે.
વૈભવ સૂર્યવંશી જેવા યુવા ખેલાડીઓનો ઉદય
બીજી તરફ, ભારતીય ક્રિકેટમાં યુવા પ્રતિભાઓનો ધમધમાટ જોવા મળી રહ્યો છે. વૈભવ સૂર્યવંશી જેવા યુવા ખેલાડીઓ આંતરરાષ્ટ્રીય સ્તરે ડેબ્યૂ કરવા માટે તૈયાર છે. વૈભવને આયર્લેન્ડ પ્રવાસ માટે સંભવિત ખેલાડીઓની યાદીમાં સ્થાન મળ્યું છે. પસંદગીકારો તેને આયર્લેન્ડ, ઝિમ્બાબ્વે કે એશિયન ગેમ્સમાં અજમાવવા અંગે વિચારી રહ્યા છે.
ટીમમાં પહેલાથી જ સંજુ સેમસન, અભિષેક શર્મા અને ઇશાન કિશન જેવા ખેલાડીઓ શાનદાર ફોર્મમાં છે. આવી સ્થિતિમાં જો નવા ખેલાડીઓને તક આપવામાં આવશે, તો ચોક્કસપણે કોઈ અનુભવી ખેલાડીને પડતો મૂકવો પડશે. જો સૂર્યકુમાર પોતાની બેટિંગમાં સાતત્ય નહીં લાવે, તો તેનું પત્તું કપાઈ શકે છે અને ટીમ ઇન્ડિયા નવા યુગ તરફ પ્રયાણ કરી શકે છે.
Follow Us On Google News
Follow Us On WhatsApp
Follow Us On facebook
Leave a Comment