પશ્ચિમ બંગાળની રાજધાની કોલકાતામાં તૃણમૂલ કોંગ્રેસ (TMC)ની રેલી દરમિયાન ભારે હોબાળો અને તંગદિલીનો માહોલ સર્જાયો હતો. બાલીગંજ ફાડીથી હાજરા મોડ સુધી યોજાયેલી રેલી દરમિયાન તૃણમૂલ કોંગ્રેસ અને ભારતીય જનતા પાર્ટી (BJP)ના કાર્યકરો આમને-સામને આવી જતા બંને પક્ષ વચ્ચે ઘર્ષણ થયું હતું. રેલી દરમિયાન બંને પક્ષના સમર્થકો વચ્ચે ઉગ્ર બોલાચાલી, ધક્કામુક્કી અને સૂત્રોચ્ચાર જોવા મળ્યા હતા. કાર્યકરોએ એકબીજા વિરુદ્ધ “ચોર, ચોર”ના નારા લગાવતા સમગ્ર વિસ્તારમાં તણાવપૂર્ણ સ્થિતિ સર્જાઈ હતી.
પોલીસને કરવો પડ્યો હસ્તક્ષેપ
ઘટનાની જાણ થતાં જ સ્થાનિક પોલીસ અને સુરક્ષા દળો તાત્કાલિક સ્થળ પર પહોંચી ગયા હતા. પોલીસ અધિકારીઓએ બંને પક્ષના કાર્યકરોને અલગ કરીને સ્થિતિ કાબૂમાં લેવાનો પ્રયાસ કર્યો હતો. ઘટનાના કારણે રેલીના માર્ગ પર થોડા સમય માટે અફરાતફરીનો માહોલ સર્જાયો હતો.
મમતા બેનર્જીનો પોલીસ પર આક્ષેપ
રેલીમાં સર્જાયેલા વિવાદ બાદ પશ્ચિમ બંગાળના પૂર્વ મુખ્યમંત્રી મમતા બેનર્જીએ પોલીસ અને વહીવટી તંત્ર પર ગંભીર આક્ષેપો કર્યા હતા. તેમણે જણાવ્યું કે કોલકાતા હાઈકોર્ટે રેલી યોજવાની મંજૂરી આપી હોવા છતાં ભાજપના કાર્યકરોએ રેલી રોકવાનો પ્રયાસ કર્યો હતો. તેમણે કહ્યું કે તેઓ સીધો ભાજપને જવાબદાર નથી ગણતા, પરંતુ પોલીસ અને વહીવટી તંત્ર પોતાની જવાબદારી નિભાવવામાં નિષ્ફળ રહ્યું છે. મમતા બેનર્જીના જણાવ્યા મુજબ, પોલીસ દ્વારા ભાજપને રેલીના માર્ગ પર મંચ અને માઇક્રોફોન લગાવવાની મંજૂરી આપવામાં આવી હતી, જ્યારે તેમની પાર્ટીના હેન્ડ માઇક્રોફોન તોડી નાખવામાં આવ્યા હતા. તેમણે એવો પણ આરોપ લગાવ્યો કે તેમના પક્ષના કાર્યકરો સાથે મારપીટ કરવામાં આવી હતી અને મહિલાઓ, યુવાનો તેમજ વરિષ્ઠ નાગરિકોને પણ છોડવામાં આવ્યા નહોતા. તેમણે દાવો કર્યો કે તૃણમૂલ કોંગ્રેસના આઈટી સેલની મહિલા અધ્યક્ષને ઘેરી લેવામાં આવ્યા હતા, જેના કારણે તેમને વ્યક્તિગત રીતે સ્થળ પર પહોંચીને બચાવ કરવો પડ્યો હતો.
પોલીસની કામગીરી પર ઉઠાવ્યા સવાલ
મમતા બેનર્જીએ પોલીસની કામગીરી પર સવાલ ઉઠાવતા જણાવ્યું કે જો હાઈકોર્ટનો સ્પષ્ટ આદેશ હતો તો તેનું પાલન કેમ ન થયું. તેમના મતે આ અદાલતની અવમાનના સમાન બાબત છે. તેમણે આરોપ લગાવ્યો કે પોલીસ શાંતિપૂર્ણ રીતે રેલીમાં જોડાયેલા લોકોને સુરક્ષા આપવામાં નિષ્ફળ રહી અને તેના બદલે તેમના પક્ષના કાર્યકરો પર કાર્યવાહી કરવામાં આવી. આ સમગ્ર ઘટનાને લઈને કોલકાતામાં રાજકીય માહોલ વધુ ગરમાયો છે અને બંને પક્ષોએ એકબીજા સામે ગંભીર આરોપો લગાવ્યા છે.
Follow Us On Google News
Follow Us On WhatsApp
Follow Us On facebook
Leave a Comment