Himachal Bilaspur cloudburst : હિમાચલના બિલાસપુરમાં આભ ફાટ્યું, અનેક વાહનો કાટમાળમાં દટાયા, માર્ગો ધોવાયા

હિમાચલ પ્રદેશના બિલાસપુર જિલ્લાના નૈના દેવી મતવિસ્તારના ગુતરાહન ગામમાં શનિવારે વહેલી સવારે વાદળ ફાટવાથી ભારે વિનાશ સર્જાયો હતો. અચાનક પડેલા વરસાદ અને કાટમાળના પ્રવાહને કારણે રસ્તાઓને મોટું નુકસાન થયું અને અનેક વાહનો કાટમાળ નીચે દટાઈ ગયા.

વ્યથિત ગ્રામજનોએ તંત્રને વિનંતી કરી

સદભાગ્યે આ કુદરતી આફતમાં કોઈ જાનહાનિ થઈ નથી, નહિતર ભયાનક દુર્ઘટના સર્જાઈ શકી હોત. આ ઘટનાથી વ્યથિત ગ્રામજનોએ તંત્રને વિનંતી કરી છે કે તાત્કાલિક અસરથી સ્થળની મુલાકાત લઈને નુકસાનનું મૂલ્યાંકન કરવામાં આવે અને અસરગ્રસ્તોને

પૂરતું વળતર અપાય. આ સિવાય, મંડી જિલ્લાના ધરમપુર તાલુકાના સપદી રોહ ગામમાં પણ શનિવારે સવારે લગભગ 4 વાગ્યે ભૂસ્ખલનની ઘટના બની હતી.

ભૂસ્ખલનના કારણે ઘણા ઘરો કાટમાળથી ઘેરાઈ ગયા હતા, જેના કારણે ગ્રામજનોમાં ભયનું વાતાવરણ ફેલાયું છે.

હળવાથી મધ્યમ સ્તરનો વરસાદ

હવામાન અંગેની આગાહીમાં પણ ચિંતા વ્યક્ત કરવામાં આવી છે. હિમાચલ પ્રદેશના અનેક જિલ્લાઓમાં આબોહવા ફરીથી બગડતી જણાઈ રહી છે. શિમલા હવામાન કેન્દ્ર

મુજબ, 13 અને 14 સપ્ટેમ્બરે રાજ્યના અનેક વિસ્તારોમાં હળવાથી મધ્યમ સ્તરનો વરસાદ પડી શકે છે. ખાસ કરીને કાંગડા, ઉના, હમીરપુર, બિલાસપુર અને મંડી જિલ્લાના કેટલાક વિસ્તારોમાં ભારે વરસાદની શક્યતા દર્શાવી ઓરેન્જ એલર્ટ જાહેર કરવામાં આવ્યું છે.

જ્યારે શિમલા, સિરમૌર, સોલન, કુલ્લુ અને ચંબાના વિસ્તારોમાં હળવાથી મધ્યમ વરસાદની સંભાવના દર્શાવતા યલો એલર્ટ જાહેર કરવામાં આવ્યા છે.