Meta Platformsને ₹3,100 કરોડનો દંડ: બાળકોના માનસિક સ્વાસ્થ્યને નુકસાન મામલે કોર્ટે ઠેરવ્યો દોષિત

Meta fine news : ન્યુ મેક્સિકોના એટર્ની જનરલ રાઉલ ટોરેઝ દ્વારા 2023માં દાખલ કરવામાં આવેલા આ મુકદ્દમામાં જ્યુરીએ રાજ્યના વકીલોની તરફેણમાં ચુકાદો આપ્યો છે. જ્યુરીએ અવલોકન કર્યું કે મેટા તેના પ્લેટફોર્મ પર બાળકોની સુરક્ષા સુનિશ્ચિત કરવાને બદલે પોતાના નફાને વધુ મહત્વ આપે છે.

કંપનીએ જાણીજોઈને બાળકોના માનસિક સ્વાસ્થ્ય, સોશિયલ મીડિયાના વ્યસન અને જાતીય શોષણના જોખમો અંગે જનતા અને વાલીઓને ગેરમાર્ગે દોરતી માહિતી આપી હોવાનું સાબિત થયું છે.

જ્યુરીએ હજારો ઉલ્લંઘનોને ધ્યાનમાં રાખીને મેટા પર 375 મિલિયન ડોલર (અંદાજે ₹3,100 કરોડ) નો દંડ નક્કી કર્યો છે. જોકે, આ રકમ ફરિયાદ પક્ષ દ્વારા માંગવામાં આવેલી રકમ કરતા ઘણી ઓછી છે.

આશ્ચર્યની વાત એ છે કે, આટલા મોટા દંડ અને ગંભીર આરોપો છતાં, મેટાના શેરમાં લગભગ 5% નો ઉછાળો જોવા મળ્યો હતો, કારણ કે રોકાણકારોને દંડની રકમ કંપનીના 1.5 ટ્રિલિયન ડોલરના બજાર મૂલ્ય સામે નજીવી લાગી હતી.

ચુકાદો ભલે મેટાની વિરુદ્ધમાં આવ્યો હોય, પરંતુ અત્યારે કંપનીને તેની કામગીરીમાં કોઈ તાત્કાલિક ફેરફાર કરવાનો આદેશ આપવામાં આવ્યો નથી. હવે આ કેસ ન્યાયાધીશ પાસે જશે,

જે નક્કી કરશે કે મેટાના પ્લેટફોર્મથી ખરેખર કેટલું ‘જાહેર નુકસાન’ થયું છે અને શું કંપનીએ પીડિતોને વળતર ચૂકવવું જોઈએ. આ કેસની આગામી મહત્વની સુનાવણી મે 2026માં યોજાવાની છે.