પેરિસ ઓલિમ્પિકના બ્રોન્ઝ મેડલ વિજેતા Aman Sehrawat પર એક વર્ષનો પ્રતિબંધ! જાણો પૂરો મામલો

પેરિસ ઓલિમ્પિકમાં બ્રોન્ઝ મેડલ જીતીને દેશનું ગૌરવ વધારનાર રેસલર અમન સેહરાવતને રેસલિંગ ફેડરેશન ઓફ ઈન્ડિયા (WFI) દ્વારા એક વર્ષ માટે સસ્પેન્ડ કરવામાં આવ્યો છે. હવે તે રેસલિંગ સંબંધિત તમામ પ્રવૃત્તિઓથી દૂર રહેશે. માત્ર 21 વર્ષની ઉંમરે 57 kg ફ્રિસ્ટાઈલ કેટેગરીમાં પ્યુઅર્ટો રિકોના ડેરિયન ક્રુઝને હરાવીને ઓલિમ્પિક મેડલ જીતનાર અમન ભારતનો સૌથી નાની ઉંમરનો ઓલિમ્પિક મેડલ વિજેતા બન્યો હતો.

તેને ડિસ્કવોલિફાઇડ ઠેરવવામાં આવ્યો

અમનનો મેડલ પેરિસ ઓલિમ્પિકમાં ભારતનો એકમાત્ર કુસ્તી મેડલ હતો. ભારતે અત્યાર સુધી કુસ્તીમાં આઠ ઓલિમ્પિક મેડલ જીત્યા છે – જે બધા બ્રોન્ઝ છે, સિવાય કે સુશીલ કુમાર અને રવિ દહિયાનો સિલ્વર. જો કે, અમનની કારકિર્દીને મોટો ફટકો પડ્યો જ્યારે તે વર્લ્ડ રેસલિંગ ચેમ્પિયનશિપ (ઝાગરેબ, ક્રોએશિયા) પહેલા બહાર થઈ ગયો. અમન, જે 57 kg કેટેગરીમાં રમે છે, તેનું વજન 1.7 kg વધારે હોવાનું જાણવા મળ્યું હતું. નિયમો અનુસાર, આનાથી તેને ડિસ્કવોલિફાઇડ ઠેરવવામાં આવ્યો અને ભારતે સંભવિત મેડલની તક ગુમાવી દીધી. આ પછી, 23 સપ્ટેમ્બના રોજ, WFIએ અમન અને તેના કોચિંગ સ્ટાફ જગમિંદર સિંહ, વીરેન્દ્ર, નરેન્દ્ર અને વિનોદને કારણ બતાવો નોટિસ મોકલી.

આંતરરાષ્ટ્રીય મંચ પર દેશની છબી ખરાબ કરી

5 ઓક્ટોબરે દિલ્હીમાં રેસલિંગ ફેડરેશનના હેડક્વાર્ટરમાં થયેલી સુનાવણીમાં અમનનો જવાબ સંતોષકારક મળ્યો ન હતો. ફેડરેશનના પ્રમુખ સંજય સિંહ અને શિસ્ત સમિતિએ સ્વીકાર્યું કે અમનએ આંતરરાષ્ટ્રીય મંચ પર દેશની છબી ખરાબ કરી છે. આ પછી, તેને 22 સપ્ટેમ્બર 2026 સુધી તમામ રાષ્ટ્રીય અને આંતરરાષ્ટ્રીય સ્પર્ધાઓમાંથી સસ્પેન્ડ કરવામાં આવ્યો હતો, એટલે કે આખા વર્ષ માટે.

હવે 2026 એશિયન ગેમ્સમાં ભાગ લઈ શકશે નહીં

WFI પત્રમાં સ્પષ્ટપણે કહેવામાં આવ્યું હતું કે, “તમે નિર્ધારિત વજન શ્રેણી જાળવી રાખવામાં નિષ્ફળ ગયા, જેના કારણે ભારત સંભવિત મેડલથી વંચિત રહ્યું અને સરકારને નાણાકીય નુકસાન થયું. આ નિર્ણય અંતિમ અને બંધનકર્તા છે.” અમન હવે 2026 એશિયન ગેમ્સમાં ભાગ લઈ શકશે નહીં, કારણ કે ઇવેન્ટની તારીખો (19 સપ્ટેમ્બર-4 ઓક્ટોબર, 2026) તેના સસ્પેન્શન સમયગાળામાં આવે છે.

પેરિસ ઓલિમ્પિકનો હીરો હવે અનુશાસનહીનતાને કારણે એક વર્ષ માટે રમતથી દૂર રહેશે. આ કેસ ફક્ત એક ખેલાડીનો નથી, પરંતુ ભારતીય રમત જગત માટે એક કઠોર પાઠ છે. શિસ્ત અને જવાબદારી પ્રતિભા જેટલી જ મહત્વપૂર્ણ છે.