India vs Pakistan Asian Games 2026 Final : આ મહામુકાબલામાં ભારતીય ટીમના કપ્તાન શ્રેયસ અય્યરે ટોસ જીતીને પ્રથમ બેટિંગ કરવાનો મહત્વપૂર્ણ નિર્ણય લીધો છે. જોકે, ટોસ દરમિયાન સ્ટેડિયમમાં એક અજીબ દ્રશ્ય જોવા મળ્યું હતું. ભારત અને પાકિસ્તાનના કેપ્ટનો વચ્ચે પરંપરાગત રીતે હાથ મિલાવવામાં આવ્યા ન હતા. એશિયા કપ અને આઈસીસી ટૂર્નામેન્ટ્સ બાદ હવે એશિયન ગેમ્સના ગોલ્ડ મેડલ મેચમાં પણ ‘નો-હેન્ડશેક’ નીતિ કાયમ રહી હતી.
અય્યર અને સાહિબઝાદા વચ્ચે અંતર
ટોસ સમયે પાકિસ્તાની કેપ્ટન સાહિબઝાદા ફરહાન અને ભારતીય કપ્તાન શ્રેયસ અય્યર વચ્ચે થોડી વાતચીત તો થઈ, પરંતુ બંને ખેલાડીઓએ એકબીજાથી નોંધપાત્ર અંતર જાળવી રાખ્યું હતું. બંને કેપ્ટનોએ એકબીજાની નજીક આવ્યા વિના કે હાથ મિલાવ્યા વિના ટોસની પ્રક્રિયા પૂર્ણ કરી હતી. ઉલ્લેખનીય છે કે, સેમિફાઇનલમાં ભારતે શ્રીલંકાને 124 રનથી માત આપીને ફાઇનલમાં પ્રવેશ કર્યો હતો, જ્યારે પાકિસ્તાને બાંગ્લાદેશને હરાવીને ગોલ્ડ મેડલ મેચ માટે પોતાની જગ્યા પાકી કરી હતી.
અન્ય રમતોમાં ખેલાડીઓએ હાથ મિલાવ્યા
એશિયન ગેમ્સ 2026ની અન્ય રમતોમાં ભારત અને પાકિસ્તાનના ખેલાડીઓ અત્યંત રમતદિલી અને સામાન્ય રીતે એકબીજાનું અભિવાદન કરતા જોવા મળ્યા છે. ટેબલ ટેનિસની મેચ બાદ ભારતીય અને પાકિસ્તાની ખેલાડીઓએ એકબીજા સાથે હેન્ડશેક કર્યા હતા, જ્યારે હોકીની સેમિફાઇનલમાં પણ બંને ટીમોના ખેલાડીઓ વચ્ચે ખેલદિલીભર્યું વાતાવરણ જોવા મળ્યું હતું. જોકે, ક્રિકેટમાં જ આ પ્રકારનો ‘નો-હેન્ડશેક’ સિલસિલો જોવા મળી રહ્યો છે. ઓલિમ્પિક કાઉન્સિલ ઓફ એશિયા (OCA) કે IOCના નિયમો મુજબ હાથ મિલાવવો ફરજિયાત નથી, પરંતુ રમતગમતમાં તે એક સન્માનજનક પરંપરા ગણાય છે.
Follow Us On Google News
Follow Us On WhatsApp
Follow Us On facebook